اهلا يشهر المرحمة ...ارحم دموع الصايمة

من طرف **مرتضى الصافي** الجمعة يونيو 24, 2016 8:58 am

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

نعرف مصابك ياشهر ....يالدمعتك حمرة
وي دمعة الزهره ...وي زينب الكبره

تتيتم إبشهرك عجب ...بت حيدر او امها
ما ينحمل همها ..لا لا تيتمها

وحدة إصرخت ياوالدي ...وحدة إصرخت يمه
أشرف نسه الأمه ...بس تفرق الهظمة

خيمة الابو والام بعد ....بس ياجرح منهم أشد
شهرك أخذ هامة وضلع ...من زينب ومن فاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

ماتت خديجة الطاهرة ...والزهرة حضرتها
شافت جنازتها ...والامه دفنتها

والزهرة ماتت بالالم ...سطروها هظموها
بالخفية ودوها ...بالظلمة دفنوها

وزينب عزيزة حيدره ....ذبحوها بالعصرة
ماطابت الحسرة ...واسوها بالطبره

لمن رجع حامي الحمه ....والهامه تتقاطر دمه
صوت النوايب يرتفع ..من زينب وفاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

زينب تقلك ياشهر ...لا تنحرج قلي
هم يتمت مثلي ...لا بعدي لا قبلي

من مثلي عدها ابهل الخلق ...والد مثل حيدر
ويغدره سيف الشر ...بغيابه ما اقدر

جاوبني يا شهر الحزن ...يالماخذ الغالي
شايف مثل حالي ...من غيبة الوالي

صمتك وظن مثلي صمت ..هم مثلي انت تيتمت
هذا العتب ماينقطع ...من زينب ومن فاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

ام افقدت هذا الشهر ...امها وكثر همها
من فارقت امها ...جان النبي يمها

وانه افقدت حيدر علي ...حيدرنه شيعوضه
وبغيره ما ارضه ...رجعه ولو لحظة

يايمه والاب لو رحل ...يكسر ظهر بنته
نجم الظهر شفته ..ما تنفع السكته

لا ياشهر ما قصرت ...وين العزيز اتخيرت
ماينقبل هذا الوضع ...من زينب ومن فاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

من مثل ابوي ورحمته ...من طبروا الهامه
ليله ولا نامه ...عينه على ايتامه

حقي اذا ابجي دهر ...واصرخ ولا اكابر
حامي الحمه مسافر ...من يجبر الخاطر

رمضان إله بقلبي جرح ...ابدا ولا يشفه
ماخذ ابو الكلفه ...اي والله ياوسفه

غير يرمضان الاسم ...لقبتك بشهر اليتم
ون اليتامه ينسمع ...من زينب ومن فاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة

يايمه من جاني الخبر ...صار الصبح أظلم
ركن الهدى إتهدم ...والدنيا مطرت دم

لو بيدي للمسجد رحت ..أسأل على اخباره
هذا الحمه جاره ...من يتم ازغاره

يايمه رمضان شعمل ...يالعملته عمله
من طاح ابو الحمله ...لا والله مو سهله

يمه القلع خيبر وسف ..وجهه اصفر وجسمه ارتجف
حتى الحجر ون ونصدع من زينب ومن فاطمة

اهلا يشهر المرحمة ...ارحم دموع الصايمة
بهلالك نشوف الدمع ...من زينب ومن فاطمة